七月一日游遊

平時星期六, 日, 都系參加教會活動, 所以每逢到假日, 好多時我都系希望同屋企人一齊渡過. 我屋企人對活動的選擇好少, 來來去去都系BBQ.

天氣熱左, 姨甥女都好想去游水, 打緊八號風球都無得去, 睇左幾日天氣報告, 6月30日都仲落緊雨, 但天氣報告中7月1日開始放晴, 所以我同家姐都諗要滿足咁多人的願望, 都系去海灘BBQ.

BBQ一族有: 我媽媽, 夏天都要著長袖衫(樽領更可以確保唔怕冷傷風)既大家姐, 各有一個BB既三家姐及四家姐, 仲有大家久違了果個有五歲身型但只有三歲大的表姨甥以及佢媽媽... (呢個表姨甥而家系6-7歲身型但只系有4歲多...)

落水一族: 有姨甥一號, 六號及七號, 以及帶埋盒西餅+曲奇去海灘BBQ既七舅父...

唔BBQ又唔落水一族: 有心臟病既姨媽(好開心見佢可以出嚟海灘行吓), 成日呢系屋企最鍾意打機既姨甥三號(佢仲帶埋本書去BBQ, 實行以書會友)

要去石澳燒野食都唔咪一件容易事, 為左確保有燒烤爐, 我姐夫要晨早6點鐘起身7:30去到, 實行勇奪第一爐..否則就要等等等....

BBQ既過程中有一個小插曲:

話說阿表姨甥天生活潑好動, 但佢媽媽要佢食左一啲食物先比佢去玩水, 到佢終於有得落水既時候啲表姐們已經出晒海邊, 佢唔等媽媽就一支箭向前走, 佢媽媽因為比一班年青人阻住, 轉個頭就唔見左表姨甥....正在搵緊佢之際, 突然聽到救生員廣播: 黃X浩小朋友的家長, 請到救生席, 你既小朋友等緊你.... 我個個姨甥都即刻上水問系咪真系阿表姨甥..我地仲估系同名同姓既小朋友, 點知...真系..

原來表姨甥一唔見到媽咪就好驚, 但又好醒目喊住走去看台搵人哎咪, 隔離一個女職員對我表姐講: 又系呢個小朋友呀, 如果比我早啲見到佢咪唔洗哎咪囉......我表姐只好..

我地玩到下午6點幾便回程, 回程既時候, 我啲姨甥個個都變晒......燒乳豬