生日大餐

之前講過, 生日遇上返學, 所以改日再慶祝. 平時和姨甥一齊慶祝生日, 大家姐已預備晒食物. 今次我補祝生日, 當然是我自已要諗食咩野..

有時諗起媽媽平日煮的生日餐, 來來去去都系: 炆鴨, 炆冬菇, 豉油鷄, 蝦, 蟹, 瑤柱.. 母親節已經食左一次, 如果再翻炒同一樣既餸, 真系好有酒樓做餐意味, 所以我特別搞搞新意思:

登登登登...

請大家唔無掛住留意枱面上既報紙, 我家實在是環保一族, 不美觀請見諒. 其中有9款都是我做架! (如果包埋個菠蘿腸, 可以算是10味呀...haha)

先嚟醉鷄, 食譜是跟"阿蘇"做的, 但唔鍾意太過多酒味的, 最好只浸4個鍾, 否則會較苦. 但我浸左一晚, 就太過多酒味. 否則都唔錯.

東坡肉, 味道是跟黃淑儀食譜, 又系前一晚先做好. 好似好肥膩, 但啲肉料都好好味. 要決是一件靚的五花腩, 否則點煲都系麻麻地.

賽旁蟹, 有點失敗, 太過多水, 可能啲急凍帶子會出好多水. 一邊炒一邊出水. 唔緊要我會再嘗試, 下次會改用瑤柱.

黃金蝦, 是我的至愛, 炸蝦後再加鴨蛋王再炒. 姨甥三好都話好味. 不過最好用細既軟殼蝦, 啲殼會再脆啲好味啲.

法蘭西白酒青口, 雖然只系用左大陸既急凍青口, 但系個湯既味真系好似去法國leon 食既煙肉青口. (法國青口是200蚊, 大陸青口是20蚊.. 系有分別既)

我知我知, 如果換左個稍為好少少既盤裝左啲青口, 個買相好啲, 吸引力都大啲. 下次會注意.

因為爸爸格外買多左餸, 所以枱上既食物, 都只系食左一半. 但都好開心, 大家鍾意食.

生日天

每年生日, 都會與大家一同慶祝, 因為我的姨甥三號是和我同一天生日, 所以都會一齊慶祝.

由於今年的生日, 剛巧是要返學, 仲要做presentation, 而且是最後一組, 即系無得早走, 還好這是最後一科, 完成這科, 我就畢業, 諗起都開心.

其實生日要返學, 都有點掃興, 特別是有同學願做野, 成日想別人做埋佢哪一部份. 算啦, 最後一科, 再加上我年季只讀一科, 盡人事做埋佢.

講起要present, 我地個老師都系幾嚴格, 以前上佢堂, 真系有點怕. 唔知系佢年紀大左收左啲火, 還是佢有愛情滋潤, 今次老師個樣親切左.

說實話做, 今次沒有另一個同學幫手, 其他同學又比唔到意見, 有時都擔心做得唔好. 到present當晚, 幾個同學都預先做了一次present, 時間都足夠. 只是其中一個麻煩同學, 又遲到, 又唔自已練習, 以為自已會做得好好, 點知真有點累街坊, 用多左時間. 幸而勉強在限定時間多一點點, 老師叫定.

在4組同學中, 老師竟然讚我地是最好一組, 真是一份好既禮物. 說實話, 我地只是按這兩年來累積的經驗做, 也不是特別出色. 實在是其他組真的做得麻麻地,

無論如何, 今次生日雖然是要返學, 竟然有一份金錢買不到的禮物.. 感謝主!

瘋狂二家姐

每年既復活節, 二家姐都會有一個例行公事, 就是寄復活蛋. 可能澳洲人對派復活蛋是一件好開心既事, 所以就算我地每次都叫家姐唔無再寄返嚟, 佢都仍然會寄.

之前已講過, 我二家姐在三月中返過香港. 而佢又真的帶了復活蛋返嚟. 滿己為今年佢已帶了復活蛋就唔會再寄. 點知系復活節前幾日, 我又收到郵局掛號信.. 每次收到家姐掛號信, 就讓我聯相到尹光的一首歌: 從前寄生果, 我仲應付得嚟... 家姐要電視機..名牌系最合宜, 手表風扇又帶海味電算機..


今次家姐記仲多過帶返香港.. 佢系咪唔知食朱古力好肥呢..

其實每次收到都復活蛋朱古力都會"又驚又喜".

驚: 是因為之前已有好多朱古力未食, 都唔知可以點食晒佢.

喜: 家姐系好有心機, 只是想大家開心. 聽到佢電話把聲咁開心, 我都唔敢掃佢興..

二家姐真的是改不了..

再到南生圍

上半年最後一次行山, 我們選定南生圍. 由於大財團就快佔據呢塊大自然, 再加上上次比人縱火, 我們趁著還有機會, 就再去多一次.

一星期前睇天氣報告, 話會落雨, 所以我就叫各位弟兄姊妹一同祈禱, 為這天有合適天氣祈禱. 到了星期六, 看到天氣還是有點熱, 而天文台又說會到晚上才會有雷暴, 所以就憑信心通知大家, 繼續行, 求神比我們行完先落雨.

大家見到幾多牽牛花? 春天到了, 有好多花開.

渡船之前, 見到有桑樹, 都已熟晒.

早前有報導做船家叔叔因為要比人加租, 所以唔再做. 幸好後來又再次撐船, 否則大家都唔知點過河. 船費仍然是5蚊鷄.

系渡頭有幾十人, 我最初仲以為呢啲人系搭船, 仲替船家開心, 有大生意. 點知呢堆人只系到此一遊. 家長帶埋小朋友參觀大自然...

大家仲系呢堆盧韋草還左一陣. 扮偷渡客..

呢個就系早前火災時被燒過的樹幹. 唔知棵樹還可以生存嗎? 是財團放火, 還是無公德的人做, 無人知道.

無線經常在這個位置拍戲..(無影到個橋頭, 大家可能唔認得)

今次有好幾位朋友都帶了家人來, 我們可以在大草地玩遊戲及分享福音, 實在太好了. 之後我們朝著豆腐花檔進發, 都行了最少45分鐘才到. 以前我表姐在元朗白種菜, 今次行南生圍就像回到以前的路徑一樣.

估唔到假日好多旅行團到南生圍作"到此一遊", 去到豆腐花檔有好多人專成到來吃一餐(都幾搞笑). 如果我是大陸遊客, 來到南生圍都唔知有咩好睇, 佢地平時都系鄉村, 親近大自然, 只有我地呢啲香港長大既人, 小毛見大毛.

離開豆花檔時, 我地開始見到烏雲密佈, 所以叫大家唔無再咪咪麼麼. 行快啲...

真是要感謝神, 我們一邊行, 回望南生圍草地已烏雲滿佈. 在深圳哪邊不斷行雷閃電. 就好似拍戲一樣. 有朋友打電話比朋友, 知道九龍區已落大雨. 但是我們仍然未落. 呢張相就是回望南生圍草地那邊行雷閃電的地方, 而我們的位置則沒有雨.

當我們快到巴士站時, 終於落雨了. 實在要感謝神, 因為他的預備是剛剛好. 天氣暖, 不潮濕, 又有微風. 又唔晒, 剛好完成路程才下雨, 要不要神預備, 誰可以安排得這樣恰到好處. 若不是大家系草地磨爛席, 成個鐘在草地影相, 我們也的不用在巴士站備雨便已經回程了.

感謝主!

新娘潭至烏膠藤

3月13日, 二家姐返香港既日子, 但是我早已安排了教會的行山活動, 走唔甩, 所以都要繼續帶行山.

因為這一次行山的地點, 是繼九龍坑山後又一個辛苦地點, 所以都要記錄一吓.

原本有姊妹會帶幾位舅父一同參與, 但臨時通知嚟唔到. 初時是有點失望, 但是行完整個路程, 反而要感謝神, 因為都頗辛苦. 老人家行呢條路會好吃力.

過往新娘潭都有好多鬼故, 雖然我一個都無聽過, 但這個地方一直都未嚟過. 行山的朋友話由新娘潭至烏膠藤都最少要行4-5個小時. 比我們一般的路段都較長. 開始左就無得返轉頭.. 經咨詢大家後, 我們都一至出發.







這個地方, 真的是一個行山好去處, 沿途不是只有山境, 也有水境"不是水警" .


沿途啲水好清淅



有好幾處地方都有這類既小石級



睇相同真境差一點, 真境是靚啲.



青翠樹加上藍天白雲.



將到茘枝窩前一個海邊. 好靚. 不過已行左近2個多少時才到.



水好清.





不用言喻



除了南生圍外, 這裏都是一個環境好美既保育區.



這些樹幹是好特別, 哈哈, 特別到我都唔記得左佢點形成. 一條條樹藤落到地面就好似榕樹變成樹幹.

其實這次的山路不是踦區, 只是較為長, 我們行到2點多才到逹一個小村(其實只有3-4間屋, 專為假日行山人仕而開的小食店). 再行多一個小時才到茘枝窩.

本來以我們年青人, 3-4個小時便可以完成. 但因為大家見到風境實在好靚, 行到好似" 蟻冷" 單是影相都影左一個小時. 到茘枝窩已是4點.

作為一個領隊, 見到天氣開始晚, 大家又開始攰, 我實在有點擔心. 3月還未算日長夜短. 如果到了近6點, 我擔心無巴士搭之餘, 天色暗不單對行山不利, 所以都催促大家快步走. 我的小宇宙在呢個時候反而旺盛, 但大家卻開始辛苦.

好彩有2-3個年輕人還精力充沛, 大家互相鼓勵, 我們在6點前終於行到車站,

這次行山又破了我們的一個紀錄. 連埋食中午飯, 我們行了6-7個小時..

姨媽

說真的, 當我們知道姨媽跌親, 撞傷左個額頭, 跟住即日就話佢中風, 所以去德國前, 都擔心在外國時佢已捱唔過. 可幸當我返到香港時, 佢已轉去九龍醫院休養.

返港後還未去探姨媽時. 與幾姐妹一同飲茶時, 四家姐剛探完姨媽, 見到病床有一個心臟既急救機器, 心諗姨媽唔通就咁唔得. 大家都即刻諗住到探病時再去醫院.

其實我心裏想, 姨媽如果信耶穌就好了, 如果她真的要離開, 我地他日可以在天堂見. 但系我有啲膽脅, 始終咁多親戚中, 只有我一個系基督徒. 去醫院途中. 我心裏同耶穌講: 耶穌, 我好希望姨媽信耶穌, 我唔知有無機會去講福音, 但你幫我!

去到病床時, 見到姨媽好辛苦既樣, 感覺佢好快要離開, 我走到床邊叫佢一聲. 佢應左我, 知我系邊個. 我心裏子忐忑, 我應唔應該講福音呢? 正當呢個時候,媽媽嚟到病床, 我更加忐忑. 呢一刻, 我實在覺得自已好似聖經中既尼希米, 只有一次機會, 如果錯過左, 可能無下一次. 我默默祈禱: 耶穌, 你給我合宜的說話. 希望姨媽信祢. 於是我開口(其實我都唔知自己應該講咩)就講

我: 姨媽, 耶穌幫你好唔好呀? (媽媽呢個時候竟然搭訕同姨媽講, 主幫你好唔好呀? )

姨媽: 好呀! (我既眼淚已忍唔住流出嚟)

我: 姨媽, 信耶穌好唔好呀? (我個腦呢刻只有呢一句)

姨媽: 好呀! (佢望住我話好呀! )

呢一刻好感動, 不過我知道我未真正同佢講完整福音, 在這個時刻卻又唔能夠好詳細去講晒. 所以我邀請姨媽做祈禱邀請耶穌進入心裏. 只有將她交在耶穌手裏. (事後, 我無諗過媽媽已好快將我叫姨媽信主既事唔夠幾分鐘就話既比人知..) 之後一星期, 有我又再邀請教會牧師去醫院再次與姨媽作認信祈禱.

這個半月以來, 我去探姨媽, 都會和她一同祈禱. 其實我無做好一件事, 就是叫院牧去探佢. 只有我出現時, 才有人和她一同祈禱. 說實話, 每次和她一同祈禱, 我們都求主醫治, 其實信心微小, 但現在因為醫院床位不足, 醫生見情況暫時不變, 又催她出院. 她就這樣子離開醫院.

有點恩惠就是她家人從來都唔反對我和姨媽一齊祈禱. 有時更會鼓勵她完結時說阿們! 始終不是常見姨媽, 我希望姨媽所信不是只有一刻, 而是能一直信下去.

怱怱的來, 怱怱的走

姨媽因為跌倒, 所以入左醫院, 之後右半身癱瘓. 其實大家系當時都唔知姨媽是否可以過到呢一關. 所以系外國的家姐思前想後, 與其等到不能再見時才返港, 不如早一點見到最後一面.

其實家姐要返港如果無咩好藉口, 都系難有機會返嚟, 所以佢經常問我拍拖未, 如果我拍拖, 又打算結婚, 佢知道又可以有機會返香港探親. 否則以佢兩公婆要睇住舖頭, 真系幾難返港.

說實話, 家姐突然有機會返港, 都好開心, 雖然只有頭尾五天.

其實我知二家姐經常預備有返港既機會, 從佢每次帶返香港既手信, 有一啲都系買左1-2年, 每次買齊比在港的四姊妹. 除左代表佢系天生購物狂之外, 亦都感受到一份不能語諭的姊妹情(縱然以前有一啲系out 左過晒fashion ..hahah)

實在要感謝神, 比我一個好既老實, 可以隨時請1-2日假. 還記得對上一個老細. 員工如果唔咪病, 佢系唔會比人放假, 除非系紅白二事(都唔知系咩人種呀). 今次可以請兩日假同家姐行街, 感受吓闊太系平日唔洗返工既輕鬆自在..

每次二家姐返港都要買好多衫返澳洲, 其實有3分一系送比啲有聯繫以及幫過佢既朋友. 不論是親人還是朋友, 二家姐都會帶啲小禮物做手信...有時諗起佢對手因為做餐館而做到粗糙, 如果佢無手信, 我們幾姊妹都唔會覺得唔開心, 佢所花既錢真是有血有汗.

有時人真的好奇怪, 每個人買心頭好時是豪不客氣. 但卻又唔捨得花錢在基本東西上. 二家姐系一個好鍾意買衫, 褲, 鞋既人, 但系講到買電話, 佢就猶豫再三. 怕比啲仔女話佢買一個老土電話. 行足兩三日, 明知佢個電話就快瓜柴, 鏡面玻璃爆晒, 最後都話要等姨甥年尾返香港幫佢揀過一個. 真系好好笑..

所以今次由我出手, 系佢離港前既早上, 去買左個電話比佢. 佢多年系外國, 我咁多年都好少送生日禮物比佢. 等佢唔洗怕比個女話佢無taste, 最多都系阿姨無taste.

p.s. 自從多年前叫家姐為仔女祈禱, 家姐見到耶穌改變個大仔. 今次返港有機會同佢分享信仰, 或許神既時候未到. 其實二家姐經常祈禱, 又相信耶穌系主宰, 會幫佢. 不過佢又未願意決志信耶穌. 她已心裏相信, 只欠口裏承認. 希望家姐信耶穌的一天快啲臨到.

日本海嘯

之前因為要交功課, 以及忙預備主日學, 所以都無寫blog. 一次過要記翻個半月前既野都唔容易.

估唔到我有一個好平安的旅程返到香港, 第二日日本就發生海嘯. 有時諗災難之前是最平靜, 難度就系咁?

3月11日, 是史上第一次有9級地震. 原來地震未是最可怕, 海嘯才死得人多....不過人禍可能更使人害怕. 這2個月以嚟我們可以學到什麼?

1. 生命比金錢更重要, 不說已在海嘯喪生的人. 單說福島核電廠, 如果一早放棄核電廠, 就唔會有咁多人受到幅射感染. 只因為最初唔想晒左成個核電廠(又或真的唔想放棄已做的核武), 而賠上更多人的生命. 同時環境也賠上了.

2. 惡劣環境仍然可以有生命素質. 相信大家都大讚日本人在這次大地震沒有暴動, 沒有動亂. 回顧四川汶川大地震, 更有人發災難財, 真是可恥. 其實早在1995年的板神大地震, 我已留意到日本在那次地震, 人民都是好安份守已, 沒有搶掠, 只等待政府救援. 可能是日本人不想在外國人面前表現人性的醜惡. 就算是其他發達國家的人民(美國人也承認) 他們都未能好似日本人一樣咁冷靜.

3. 愛比仇恨大. 雖然我討厭日本人強霸釣魚台以及過往歷史行為. 但當人有困難, 仇恨是可以放埋一邊. 雖然我阿媽小時候親眼睇住日本人殺死幾位隣居, 但佢都捐左錢比救世軍幫日本, 佢系我面前就話日本人低死. 但系街坊面對又話: 都唔關啲後人事既.. 就連中國日本去年為撞船及稀土冷戰緊. 但天災卻又使人類善良一面顯露! 中國救援以及運送物資都是盡作人的本份.

4. 認識真正盼望. 人生沒有盼望, 就沒有生存的鬥志. 日本是一個自殺率很高既國家. 好多人都估計到不久可能會有自殺潮. 早前就有一位農民, 在災難之前好有鬥志, 將畢生的精力放在自已的農地上. 改良又改良, 成為一塊出色好土, 種出好多菜蔬. 當政府禁止福島的菜出口, 他的盼望沒有了. 如果政府下禁令之先, 也同宣告如何幫助他們, 我相信這位農民未至於看不到盼望.

認識真正盼望是從神而來. 神關一扇門, 必會開另一扇門. 若日本人認識到人生有一位主宰在掌管. 神必會幫助. 哪是多好呢! 或許這就是救世軍在日本的任務. 不單是救災, 也要救靈魂!

德國米蘭2011 - 沒有重覆的恩典

是時候要終結德國米蘭之行. (再多講, 大家確實會以為我去旅行多過去出差). 雖然過左個半月, 但仍然好想在我腦退化(老人痴呆症)未發作時回憶這次既回程.

估唔到回程前我還在德國過了第一次的節日, 是一個 fun festival , 我問老細系咩嚟架, 佢就話系一年一度既節日. 有4 天, 其中一天女性可以任性一吓(真系有人會任意亂性) 而最後一天政府會有巡遊, 花車會拎啲糖扔比路人.. 有好多小朋友會扮鬼扮馬(似萬勝節之類). 對我一個外人嚟講, 確實系無咩意義.....因為我成日既節目都系系超巿shopping.. (老細話我系超巿shopping 咁耐, 可能會比人懷疑我偷野多啲..haha).

3月10 日終於到了回程既一天, 老細送我去車站. 其實呢度啲人好好, 特別我老細兩公婆, 比我一個好似家既感覺(晚晚都系佢地煮飯比我食, 我就咩都唔洗做). 上火車既一刻, 真系有啲唔捨得佢地. 眼濕濕既我, 馬上要轉面, 擔心我老細以為我發生咩事...haha.

系火車上, 我心同神講, 神啊, 如果今次回程你又可以比我瞓到6-7個鍾, 我就相信我個飛行恐懼症已經完全痊癒, 但其實我又問自已系咪系度試探神..

因為火車延遲到站, 所以用左2個半鐘先到機場. 入到閘內等上機時.. 有一班便衣海關突然走入閘內要查passport, 第一個就查我, 難度....我今日真系似個邦女郎 - 密探??

未上機前, 我又再祈禱神啊, 如果今日回程可以瞓到6-7個鐘, 我就知道你使我完全痊癒.. 不過祈禱完左, 我又好扎心, 因為神要如何作豈是我自已決定... 就算我瞓唔著, 都會有神既恩典. 所以在起飛前我按著全人醫治既祈禱文為今次既旅程求神幫助我.

今次既飛行, 可能因為是下午機, 並未有因為我食左安睡藥而瞓到幾個小時, 但系過去2-3年既3月, 每次回程都氣流都好唔穩定, 在我多年出差, 回程都系好多氣流(特別是蘭州至廣州). 雖然我在機上瞓唔到(可以煲左2套電影狄仁傑+ 黑天鵝), 但系整個飛行系無特別氣流... 心裏感有一個聲音話比我知, 不要以為神的恩典系可以用經驗去決定. 神不是只有一種方式既恩典(瞓6-7個鐘), 神是有意想不到的平安. 感謝神!

後話: 系機上睇左狄仁傑, 我真系唔咪好明點解劉嘉玲可以攞金像獎最佳女主角, 雖然我只系有睇楊千嬅套戲作比較.. 佢好有霸氣咩?(如果系斯琴高娃做應該真系好有霸氣, 謝雪心比佢也更有霸氣..雖然心姐只系電視演員) 我仲以為李冰冰先系主角添! 只系可以嘆一句: 蜀中無大將!

德國米蘭2011 - 德國到米蘭

成日聽見到行家或朋友講系歐洲開車由呢個國家到另一個國家. 今次因為公司比較多東西要帶到米蘭, 所以老細一於開車由德國到米蘭.

其實都幾開心, 因為沿途會先經過法國境, 再入瑞士, 然後才到意大利.. 大家聽我咁樣講, 可能以為我真系遊緊埠, 去完一個國家玩, 再到另一個國家玩, 其實我只系坐車坐6-7個鐘, 午飯都要系車內食.

未出發之前, 我向老細發左一個傻問題: 老細, 我地可唔可以系法國, 瑞士及意大利既邊境停留? 如果可以, 我想影翻一張到此一遊相... 老細都比我考起, 答案當然系唔可以. 後來我先知邊境唔會有觀境台(好似青馬大橋), 只有一條雙線行車..

不過老細都都刻意駛入去法國一些小鎮, 讓我同個鬼妹有機會見識一吓小鎮風光. 沿途又有好多法國堡壘, 大家知我好鍾意睇堡壘, 佢地可能會誤會我成日睇"美女與野獸", 所以每見到一個都會話比我知. 我趁住加油時段, 落車影一兩張相.

呢啲堡壘當然比唔上天鵝堡, 但我都好滿足.

張相個堡壘細到蚊之咁, 大家話佢系廢虛都可以.

去到瑞士, 境像好不同, 因為有雪又有雨.

當老細話比我知, 好快會過全歐洲最長既隧道, 我都好期待, 但系未到入口, 已排長龍. 他們曾經要等3個幾鐘先可以過隧道, 於是我即刻祈禱, 還好, 我們只是等左大概30-40分鐘, 當遇上呢種情況, 大家都只有等.

最後經過七小時車程, 我們終於到了米蘭. 安排好會場既事宜都已經是晚上.

感謝主一路平安.

德國米蘭2011 - 遲來的聖誕禮物

這個旅程寫左幾篇都未開始請到做野, 實在要感謝神.

以前直接對上的老細, 佢地都系香港大陸人, 或香港香港人, 又或自以為香港外國人(明明一個地道香港人老細, 即系認錢唔認人)的時候, 經常都覺得員工出差系" 開開心心咁去, 開開心心咁返" 或" 比晒機會你去外國旅遊買名牌", 出差好多時都無時間買野, 開show 時無時間食野, 仲要趕飛機差點趕唔到上機.

而家老細系外國人(不是美國自大人), 我經常都向神祈禱, 神啊: 求你賜我老細身體健康, 重點: 長命百歲..... 這一年是我工作中最感到被信任的一年. 雖然我唔咪做得好好, 但老細會經常比個鼓勵. 開心既工作環境系美容的一大要訣..

今次去到德國, 老細一早就話要送一份聖誕禮物, 其實佢就算忘記左, 我都唔介意. 始終我都唔想比外國人覺得香港人去到外地工作真系" 開開心心咁去, 開開心心咁返", 當我到步, 老細話今日唔開會,仲話下午叫左個朋友帶我去買野我想要既野. 我覺得有點唔好意思, 始終我一點回禮都無.

其實有一個好上司已經系神比我最好既禮物, 當你明白呢句說話而不覺得是理所當然的時候, 可能你正在或曾在水深火熱之中..

大家又會覺得我再晒命一次, 其實神好公平.. 大家有一個好男朋友或好家庭, 唔會想到自己是幸福一族. 這只是神見我缺乏, 所以憐憫我一點!

德國米蘭2011 - 瞓左七個鐘

如果一個有飛行恐懼症的人能在飛機安然瞓覺, 呢個真系一神蹟. 篇篇呢個神蹟就發生系今次既旅程.

未出發前我2個星期以來都病緊, 可能我之前自已配左神醫開比我既藥, 我又真系以為自己可以久病成醫. 自已估計病程而食舊有既藥. 搞到我去左睇阿神醫都無咩效. 原本醫生睇病時同我講, 食完呢次都應該好翻架la. 點知, 出發現幾日都系未好. 因為德國氣温系負9度. 怕死既我, 擔心去到德國會咳死異鄉, 所以再去睇多次醫生. 阿神醫於是開左一隻好勁(好勁貴)既藥比我. 而且好眼瞓.

因為知道呢隻藥超眼瞓, 所以留嚟上機食.

每次上機後空姐又派餐, 又遞水, 就算瞓都會比佢整醒. 所以捱過頭三個鐘之後, 食完餐就食藥. 好快我就瞓著. 其實在飛機能夠瞓到3-4個鐘, 我已系好滿足, 自已知自已事. 點知到我瞓醒時, 已是6-7個鐘之後, 即系2個鐘之後會落機. 系前所未有既開心.

感謝主, 未接受祈禱醫治之前, 就算我食安眠藥都瞓得1-2個鐘, 今次可以瞓到7個鐘, 真系超開心. 就算瞓唔完2套戲都無所謂!

正因為今次系機上可以好好瞓一覺, 落機見到老細, 我都energy 暴棚.. 仲逼老細開會... hahah, 但老細覺得我落機要先休息一吓.. (咁既老細, 真系邊度揾到.. )

再一次, 多謝耶穌! 比我有好既旅程, 再比我有一個好老細!

德國米蘭2011 - 醒目8號仔

自從轉左呢間公司, 我都有著一種幸福既感覺. 雖然唔知可以做得幾長, 但能有這麼一年, 人生不枉過..

2月底又要去德國及米蘭, 這幾年都是一個人出差, 由於經濟差, 身邊既同行朋友, 已少去這些展覽, 想旅程有一個人陪都好有難度.

出發前, 由於大陸廠總遲遲都未能出辦比我. 只等到28號才有, 所以我一早就上大陸, 之前傷風感冒咳都未好, 真系幾辛苦. 早上攞完辦, 下午處理公司既事, 然後夜晚坐飛機.

可能因為個人忙左成日, 趕返屋企又要沖涼, 又要執行理, 再加上老豆成人催我"夠鍾" 出發未" , 真系好多野都忙亂唔記得鎖行理.

出門口之前, 我見到姨甥8號仔竟然幫我去鎖好個密碼鎖. 我實在要讚一讚8號仔, 佢只系一個剛4歲的小朋友, 無人教過佢要鎖行理. 但佢竟然留意到. 感謝神賜一個聰明小朋友比家姐.

每次我既行裝都好似流浪漢, 一袋二袋. 所以去到機場check in 前都已經忘記要再上一次金屬鎖, 直到我去到德國攞行理先發現自已大頭蝦.. 所以系呢度我要再次讚8號仔, 如果唔咪, 可能比人打開晒我件行理.

全人醫治

兩年半前, 在一個課程裏遇到十多年無見的一個舊同事. 還記得當年這個同事是公司裏的唯一另一個基督徒, 就是因為這關係, 所以都比較熟諾.

見到舊朋友, 而又同時是在基督教課程裏遇到, 我相信大家的的信仰並沒有冷淡, 而是不斷向上. 重遇不久, 這個朋友電郵給我, 通知我有一個基督教課程名叫: 全人醫治. 她的教友因這個課程大得幫助. 基於活到老, 學到老既原故(其實我都唔咪好老) , 而課題又似乎有關心靈系醫治, 所以我又邀請左團契的朋友參加.

這一個基督教課程不是知識方面的增長, 而是醫治人心靈既問題. 每一個人心靈畫多畫少都有一點陰暗面, 不論外表看來多健康. 幾年前已同大家講過, 因為10年前一次意外, 由星加坡飛返香港時遇到8號風球, 所以我估計我是患上飛行恐懼症. 多年來每次出差, 別人笑我有遊埠命, 但在飛機上的12-20個鐘, 不是享受, 特別在意外後的一個月. 去法國回港後, 三家姐發覺我瘦左好多, 大家還以為我開show 好辛苦. 其實是坐飛機的壓力太大. 告訢家人及朋友知這問題, 但換來以為我晒命. 所以我都只是跟一兩個體諒我的團友講.

在學習初班的頭幾個月, 我們只以為學一樣新知識, 導師叫我們按著編寫給我們的祈禱文來醫治, 我們只是跟著做, 但過了三個月, 我和另外兩位朋友, 都發覺, 這個課程使我們有一種說不出來平安. 過往一些痛苦經歷或一些別人對我, 或我對別人的埋怨, 都開始淡化. 甚至可以忘記. 縱然理論上曾經使我們恰眼瞓(星期六食完飯後上堂, 都真系好易恰眼瞓) , 但心靈卻真的慢慢改變了. 藉著祈禱醫治, 一些埋怨或痛苦都變為喜樂.

還記得去年2月臨出差前兩星期, 我看到有飛機出事, 我的恐懼感不斷擴大, 大到我喊. 幸福的是, 在出發前幾天, 機構為每一個學員安排一次祈禱醫治服侍, 在醫治的過程中, 聖靈充滿我的心, 神更讓我看到一句說話: 你要認識神, 就得平安. 在這次的旅程, 我感受患恐懼症以來第一次有康復的感覺. (當期時德國法國正遇著幾十年來的一個強颱風, 機場關閉, 而去到德國哪日卻是風和日麗. 之後坐內陸機去米蘭來回都是完全沒有氣流, 還有回港時, 仍然不斷有氣流卻又不覺得緊張)

今年2月終於完成整個課程, 澳洲的弟兄姊妹再次來講為我們作祈禱服侍. 剛好也是我3月初去歐洲再出差前的日子. 我會在之後的網誌再分享這次服侍後的經歷..

鬥一翻

每年的農曆初五或初六, 我既家庭都好鍾意去BBQ, 今年都唔例外, 好處是不用一大早就去霸爐, 其次是無人跟隊, 催促我地交爐. 適逢今年年初六是好日, 好多打工仔都要返工, 所以情況更加理想.

自從呢幾年知道獅子山公園可以燒野食, 我家都減少去西貢, 一來車費平, 而來有設司可以方便洗食物. 不過實在越嚟越多人到此燒烤, 所以平常星期六日, 要早上八點前先勉強可以揾到燒烤爐.

香港既山巒都系橫分了九龍及新界, 大家都好知道沙田有馬騮山, 由於獅子山與馬騮山相連, 近來有個別什致一少群既馬騮都出現系獅子山公園專門搶燒烤食物.

昨日當我地以為今日無馬騮到時, 當我地在處理物品就有一隻母猴企系個鐵欄頂, 作勢準備要搶食物. 唔知系咪近來學過吓幾招功夫, (當然系勉強睇得唔打得嗰種) , 我立即拎起兩技叉, 又叫我家姐拎起叉, 隻母猴見狀, 就發惡筮起棚牙. 由於漁護署要保護動物, 所以我地只可以嚇吓佢, 不過如果佢攻擊我, 我系唔會理佢死活, 一定會使出"真功夫" 放為大師傅呀....

其實而家啲馬騮系唔怕你拎叉拎棍, 只系怕有人拎住一啲疑似丫叉可以射擊既物體, 因為佢地知道人類可以用呢樣野遠佢離攻擊.. 當我同隻馬騮還在對峙時, 我另一個家姐拎出佢個仔個"黃色" 既飛蝶玩具, 佢一見呢個" 武器" 就驚, 最後佢轉向其他人既食物, 搶到一包面包就走了.

呢隻馬騮食包左, 我地擔心會有另一批過嚟. 由於佢怕我姨甥個玩具, 於是我就只好拎住個玩具, 舉起手比佢睇到, 我有"武器"在手. 大家可以想像到, 我就好似一個自由神像, 一邊燒野食, 一邊高舉"武器".

系呢幾個小時, 都不停有馬騮系咁多人群中搶食物, 當另外5-6隻馬騮又以我地為搶掠目標, 我地三姊妹又要" 出動" , 我同家姐諗左條計, 就系佢用一些紙條射出去時, 我射打張報紙發出響聲, 啲馬騮就以為我地真系用啲石仔嚟射殺佢地...HAHAH, 我同家姐配合得天衣無逢, 佢地真系驚, 仲走到樹頂. 幾隻馬騮已少向打我地主意..

特別要提一提, 在場既管理人員完全系廢既, 佢都系行行企企就咁抖人工. 當我地話比佢知有馬騮, 叫佢用丫叉嚇吓啲馬騮, 佢只系拎住支棍, 系度同人打牙交, 我覺得有必要要投訴佢地呀. 只系講啲馬騮鍾意搶既系面包, 完全無諗住做啲咩野.. 佢地就咁系政府部門支取人工.. 真是浪費納稅人既錢.

到最後, 漁護派人拎個籠去換取已被捉既馬騮, (捉到一隻小馬騮), 可能啲馬騮知道有人嚟捉佢地, 所以全部走晒, 於是我地終於可以平安大吉, 繼續燒野食.